غير متصل
موضوع قرأته فأعجبنى وملخصه " اللمسات البسيطه بتفرق فى حياة كل شخص فلا تُهملها "
كنت قاعد في فرح مع واحد صاحبي متجوز . فحبيت اسأله ايه رايك في الجواز ؟!
قالي كُل حاجه بتفرق ..
الجواز مرتبط بالتفاهم وإن محدش يدخل بينكم ..
يعني انا مثلاً واعد مراتي بعد نص ساعه من دلوقت اخدها اعشيها بره واعزمها علي كريب ..
قولتله هتاخدها بره عشان كريب ؟!
قالي الستات دول بأبسط حاجه تطلعهم سابع سما وابسط حاجه تنكد عليهم ..
اهم شيء بالنسبالها تكون معايا واوفي بوعدي ..
عندك إمبارح مثلاً لقيتها قاعده علي السرير مكشره وربنا ما يوريك قلبت وش الستات
في ليلة مفترجه .. سألتها مالك يابنتي ؟! قالت مفيش .. من هنا لهنا حلفت تقول مالها ..
لقيتها بتقولي : انت اديت اختك وبنت اختك عيديه ومدتنيش ! قولت : يابنتي ما الفلوس
في المحفظه ع الكمودينو هو انا عمري حوشت عنك حاجه ! قالت: لا انا كنت عاوزه
عيديه تديهالي إنت مش انا اللي آخدها بنفسي ! قولت : طب ما تزعليش ياستي ..
وقومت ضارب ايدي في المحفظه ومطلع ١٠٠ جنيه وبوست راسها وقولت :
كُل سنه وإنتي طيبه .. لقيتها ضحكت وفرحت وقالت : ايوه كده .. بيقولي
الغريب إنها بعد ما خدت ال ١٠٠ جنيه فتحت المحفظه وحطتها فيها تاني !! ..
ده يثبتلك إن المسأله بتفرق، وإنها عمليه تقديريه مش اكتر .. فإوعي تحسسها
إنها مجرد حاله بتعيشها .. بإيدك تخلي علاقتكم انجح علاقه، وبإيدك تخليها العكس ..
البنات كلهم عجينه واحده .. بيفرق معاهم التفاصيل، ومش البنات بس معظم الناس
عامةً بيفرق معاهم ادق التفاصيل - افتكر إنه من ٤ سنين كنت مع واحد صاحبي
وروحنا لاخوه الصغير مدرسة الابتدائي .. وكان واخد معاه علبة شيكولاته وكرمله ..
وإستأذن من مدرس الفصل ودخل وزع الشيكولاته علي زمايل اخوه كلهم .. سألته عن السبب ..
قال اخويا العيال بيغلسوا عليه ويضربوه فحبيت اجيبلهم شيكولاته ترقق قلوبهم تجاهه
وفعلاً والله تجنبوه تمامًا وبقوا يحترموه ! ..
- مراتك تتحمل اي حاجه من اللي حواليها لو إنت كويس معاها وبتهتم بالاوقات والحاجات اللي تخصها ..
- بنتك او إبنك يقدر ياكل الكُتب أكل لو طبطبت عليه وقولتله ميهمكش إعمل اللي عليك واللي يجيبه ربنا كويس ..
- تكسب حُب حد لو وسعتله في قعده او عديت وسلمت عليه أو جبتله هديه !
- بتفرق في طريقة النصيحه .. في اسلوب الكلام .
- بتفرق جدًا لما توفي بوعدك .. لما تهتم بإهتمامات اللي حواليك ..
مهما كانت طريقة تفكيره .. ممكن ساعتها يشيلك زي التاج علي راسه ..
إهتموا باللي يخصوكوا يا جدعان .. قدروهم .. الحاجات التافهه في نظرنا
دي هي اللي بتزيد العلاقه صلابه وتسندها
علي راي المثل " نوايه بتسند الزير "..
الاوضه شكلها ممكن يحلو لو حطيت فيها برواز مثلاً !
اللمسات البسيطه هي اللي بتعمل بصمه وطابع مُلفت ميروحش من القلوب ..
البوسه علي الراس بتنسي الشقي وتمسحه بأستكيه ..
يهدينا ربنا جميعًا ويحنن قلوبنا علي اللي مالهمش غيرنا .
اصلها بتفرق.
