الحلقة الحادية عشر

[الفتي الملثم]

(11)

بسم الله الرحمن الرحيم

منظمة هذا لك ! الدعوية

تقدم

الحلقة الحادية عشر
كشكولي !



بعد يومين قام أحمد بالاتصال بخالد هاتفيا

رفع خالد سماعة هاتفه قائلا: السلام عليكم

أحمد: وعليكم السلام ورحمة الله وبركاته.. إزيك ياخالد بيه

خالد: أهلا أهلا.. إزيك يا أحمد عامل إيه

أحمد: الحمد لله رب العالمين.. إيه الأخبار ؟

خالد: تمام الحمد لله..

أحمد: أنا كنت بعت لك إيميل من يومين.. شفته ؟

خالد: آآآآه شفته والله.. يا ربي ده أنا نسيت أرد عليه..

أحمد: هههه ولا يهمك

خالد: جزاك الله خيرا بجد يا أحمد.. بجد ربنا يكرمك، الإيميل جميل جدا بس أنا انشغلت بقرايته ونسيت أرد خالص.. لكن أنا قريته من ساعتها فعلا

أحمد: ولا يهمك يا عم.. المهم تكون استفدت

خالد: الحمد لله الحمد لله

أحمد: طيب.. أنت فاضي 10 دقايق كده ولا حاجة ؟ كنت عايز أكلمك شوية في نفس الموضوع

خالد: آه يا عم قول

أحمد: طيب ممكن تجيب ورقة وقلم ؟

خالد: ورقة وقلم ؟؟ قول بس أنا هأحفظ

أحمد: ماشي براحتك.. بص يا سيدي.. أنا عايزك لما تنزل تصلي المغرب تشتري كشكول 100 ورقة فاخر جدا، واختار أجمل شكل يعجبك في المحل وأحسن خامة تحبها

خالد: كشكول إيه ؟ قول تاني كده

أحمد: هههههه.. طب ممكن بعد إذنك لووو سمحت تجيب ورقة وقلم وتكتب ؟

خالد: طيب ثواني
......

خالد: تمام يا فندم

أحمد: اكتب يا سيدي النقط اللي هأقولهالك دي.. اكتب شراء كشكول 100 ورقة

خالد: تمام

أحمد: ورق فاخر وخامات جميلة

خالد: تمام

أحمد: اختار الشكل اللي يعجبك أكتر حاجة حتى لو غالي شوية

خالد: بص ماتسكتش.. اتكلم وأنا لو ملحقتش أكتب هأوقفك

أحمد: طيب.. كتبت إيه ؟

خالد: شراء كشكول 100 ورقة فاخر وخامات جميلة وأختار الشكل اللي يعجبني حتى لو غالي... بس مش فاهم حاجة

أحمد: ماتقلقش هأفهمك

خالد: أوكيش.. فهّمني..

أحمد: بص يا سيدي.. ماتكتبش بس اسمعني.. الموضوع أننا في رحلتنا وجهادنا إن شاء الله هنحتاج نحط خطط ومناهج، وهنحتاج نكتب أحاسيسنا كتير.. وهتلاقي مواضيع أو مقولات تعجبك وكده هتحب تجمعها... من الآخر هتحتاج حاجة معاك دايما تذكرك باللي أنت فيه، وتكتب فيها زي مذكراتك كده، وتتابع حالتك هل بتتحسن ولا لا قدر الله بتسوء.. وهكذا

خالد: أها.. عشان كده هنعمل الكشكول ده يعني ؟؟ طب مانعمل ملف على الكمبيوتر وخلاص؟ أسهل وأسرع وكمان هيريحنا كتير في نقل المواضيع وكده

أحمد: ما أنصحكش بصراحة.. أنا شخصيا جربت أعمل فولدر على الكمبيوتر ولقيت نتيجته مش زي الكشكول خالص.. الإنسان مهما تطور بيحس بفرق بين أنه يقرأ أو يكتب على الكمبيوتر وبين أنه يمسك حاجة مادية بين إيديه.. عارف لما تقرأ كتاب حقيقي ورق، بتحس أنك عملت إنجاز بجد حتى لو كتاب صغير..
وكمان أنت هتحتاج الكشكول ده في خروجاتك ولما تكون لوحدك من غير كمبيوتر وكده يعني.. صدقني الكشكول أحسن بكتير إن شاء الله


خالد: جميل.. طب أشتري كشكول سلك ولاعادي

أحمد: براحتك خالص.. شوف انت بتحب إيه بجد وهاته.. بس بجد لازم يكون كشكول جميل ونضيف، وماتنساش أنك هتحطه في شنطتك كتير فماتجيبش كشكول 3 متر في 3 متر يعني..

خالد: ههههه.. ماشي يا سيدي

أحمد: طيب.. كمل كتابة بقى.. بعد ما تشتري الكشكول، عايزك تجلده بأحب الالوان إليك، حتى لو جلاد مشجر أو ورق هدايا يعني.. المهم يكون لون بتحبه

خالد: انت بتتكلم بجد ؟

أحمد: آه والله.. فاكرني بأتريق؟ خالد الكشكول ده هيمثل لك حاجات كتير أوي إن شاء الله، فلازم تهتم بيه جدا.. لازم يكون في أجمل شكل يجذبك ليه..

خالد: أجلده ؟

أحمد: أيوة جلده بأي لون تحبه.. أنا مثلا جلدته بورق أبيض سادة، مش جلاد حتى.. لأني بأحب الورق الأبيض السادة

خالد: طيب ماشي.. نجلده يا سيدي.. إيه كمان

أحمد: طيب الكشكول ده يا عم خالد زي ما قلتلك عايزك تهتم بيه جدا.. فأنت شوف إيه اللي بتحبه واعمله فيه.. الزق استيكرات.. اكتب بألوان مختلفة... شخبط لو بتحب الشخابيط.. وهكذا

خالد: أنت هترجعني حضانة ولا إيه يا عم

أحمد: شكلك هتنضرب النهاردة... أكمل ولا بلاش ؟

خالد: كمل يا عم أنت بتهددني ولا إيه ههههه

أحمد: هههه عشان بس تسمعني الله يكرمك
بس عايز أنبهك لنقطة مهمة.. كل اللي بنعمله ده عشان تحب الكشكول وتتعلق بيه، فلو بسببه هتكسل أنك تعمل الكشكول أصلا يبقى خسرنا الموضوع كله من الأول... فأنا عايزك تجمل وتزين كشكولك لكن برضه ماتستهلكش وقت جامد أو تكلف نفسك مجهود فوق طاقتك بدل ما تكسل أنك تعمله من الأول...

نبدأ بقى نكتب في الكشكول..

أولا أنا عايزك تسمي الكشكول ده اسم على ذوقك أنت.. اسم يعبر عن رحلتك وجهادك بحيث أول ما تسمعه أو تشوفه تفتكر عهدك مع ربنا سبحانه وتعالى..
مثلا سميه "جهاد".. سميه "سبيل النجاة".. سميه "رحلة الطهارة".. براحتك
المهم يكون اسم أنت مقتنع بيه

خالد: تمام

أحمد: بعد كده في أول صفحة من الكشكول هتكتب التالي:

بسم الله الرحمن الرحيم

"والذين جاهدوا فينا لنهدينهم سبلنا"
أو أي آية تعبر عن معنى جهاد النفس.. أو حديث شريف بتحبه ويحمل نفس المعنى..

بعدين اكتب تحت الآية اسم الكشكول اللي اخترته

بعدين اكتب تحته "فضلا لا تفتح فأنت تكشف أسراري" أو أي جملة تخللي اللي يشوفه مايقرأش اللي فيه

وبعدين تحتها اكتب اسمك

خالد: إيه الحلاوة دي.. وأنت متخيل أن لو حد شاف الكشكول ومكتوب "لا تفتح" مش هيفتح ؟؟
ده هيبقى عايز يفتح أكتر

أحمد: ماشي ما أنت أصلا مش هتخللي حد يشوف الكشكول إن شاء الله.. بس دي احتياطات.. لكن أنت هتحفظ الكشكول بتاعك في مكتبك أو في أي مكان يكون قريب منك ودايما متاح قدامك، وفي نفس الوقت مفيش مخلوق بشري يشوفه..

خالد: ربنا يستر

أحمد: بتكتب ؟

خالد: آه ماتخافش

أحمد: جميل.. صحيح يفضل تكتب على صفحة وتسيب صفحة في الكشكول.. عشان بس يبقى جميل يعني.. لكن براحتك..
المهم.. بعدين تاني صفحة اكتب فهرس الكشكول

اكتب التالي:

- الفهرس
- إقرار وتعهد
- دعاء
- لماذا أجاهد ؟
- أدلة التحريم
- منقولات ومقتبسات وخواطر
- خطط النجاة
- مذكرات مجاهد
- مسرتي للرقي
- تمارين

حلو ؟

خالد: حلو.. معاك.. ربنا يكرمك

أحمد: هأفصّل لك كل نقطة معناها إيه...

الفهرس خلاص قلناه
صفحة الإقرار والتعهد هتكون صفحة واحدة بس، هتكتب فيها إقرار بصيغة مشابهة للتالي:
اكتب ورايا

بسم الله الرحمن الرحيم
((إقرار وتعهد))

الحمد لله رب العالمين والصلاة والسلام على أشرف المرسلين نبينا محمد صلى الله عليه وسلم

أقر أنا فلان الفلاني - اكتب اسمك طبعا - أني قررت بإذن الله تعالى أن أغير مسار حياتي السابق فيما يتعلق بالشهوات وفتنة النساء
وأن أغض بصري عما حرم الله سواء في الواقع أو التليفزيون أو الانترنت
وأن أحفظ فرجي عن العادة السرية المحرمة
وان أستعين بالله تعالى ليعفّني ويهديني ويثبتني على الحق دائما
والله على ما أقول شهيد..

وصلى الله على نبينا محمد وعلى آله وصحبه وسلم
والحمد لله رب العالمين


المجاهد عبد الله
ثم اسمك
ثم تاريخ النهاردة

بس كده.. تمام ؟

خالد: إيه !

أحمد: إيه ؟

خالد: إيه ده يا أحمد.. أنت عايز توديني في داهية.. أكتب إزاي الكلام ده..

أحمد: يا عم ماتقلقش ما أنا قلتلك ده كشكولك أنت وماحدش هيشوفه غيرك.. ولا أنا حتى..

خالد: يادي الفضيحةةةةة

أحمد: هههههه.. ماتقلقش يا فتى.. خير إن شاء الله.. المهم كتبت ؟؟

خالد: كتبت الإقرار في الورقة اللي معايا بس لسه هابقى أكتبه طبعا لما أجيب الكشكول إن شاء الله

أحمد: تمام
صحيح أنا عايزك في الصفحة الأولى وفي التعهد تحسن خطك قدر الإمكان.. كأنك بترسم الكلمات مش بتكتبها.. عشان تحب اللي هتكتبه، وتتعلق بيه إن شاء الله

خالد: ربنا يستر

أحمد: جميل.. بعد كده في صفحة الدعاء عايزك تكتب دعاء طوييييل بلهجتك واسلوبك أنت.. فصحى أو عامية براحتك.. ماتنساش يا خالد ده كشكولك أنت وجهادك أنت.. وماحدش شايفك غير ربنا سبحانه وتعالى..
اكتب دعاء جميل خاشع دافيء.. عبر عن اللي جواك... قل له يا رب أنا تعبت وأنا ضعيف أوي... يا رب مش قادر على نفسي... مش عارف أعمل إيه..
ناجي ربنا يا خالد..
قل له يا رب نفسي أتخلص من القرف اللي بأعمله ده والله.. بس مش قادر.. أيقنت يا رب أني مش هأعرف أعمل أي حاجة من غيرك.. يا رب ساعدني وأعنّي.. يا رب خد بإيدي أنا تعبت وجبت أخري..
قل كل الدعاء اللي جواك..

الدعاء المفروض ياخد منك صفحتين مزنقين على الأقل..أو أكتر..
ماتكتمش في نفسك حاجة..
ولو عينك دمعت وبدأت تعيط ماتحبسش دموعك.. ابكي واشتكي لله يا خالد.. اشتكيله من نفسك..

خالد: ربنا يعزك يا أحمد..
بإذن الله.. بإذن الله هأعمل كده..

أحمد: ربنا يعينك يا خالد.. معلش هي المرة دي الموضوع هيظهر أنه صعب وكبير أوي.. بس مجرد ما تجهز كشكولك الخطوات بعد كده هتكون أيسر إن شاء الله..
أنا بس عشان بأقولك كل حاجة مرة واحدة فشيلتك الدنيا فوق دماغك.. معلش

خالد: الله المستعان

أحمد: طيب.. بعد كده فيه قسم "لماذا أجاهد" ده المفروض هتكتب فيه أسباب أنت ليه عايز تبطل.. ليه عايز تتوب..
يعني ليه عايز تبطل نظر محرم أو فعل محرم.. إيه الأسباب اللي بتدفعك لكده ؟؟

القسم ده مش لازم تملاه كله في قعدة واحدة.. بس خصص له مثلا 10 صفحات..
وكل ماتفتكر حاجة ابقى ارجع واكتبها

خالد: تمام

أحمد: بعد كده فيه قسم أدلة التحريم.. وده هتكتب فيه الأدلة الشرعية على تحريم إطلاق البصر أو العادة السرية أو الكلام مع البنات أو الاختلاط أو أي حاجة متعلقة بالحوارات دي يعني..
انقل الأدلة دي من فتاوى على النت أو من اي كتاب.. ماتألفش طبعا، بس يا ريت تنقلها بإيدك عشان تستشعرها وتحس بيها..
يعني بلاش تطبعها وتلزقها.. إلا لو هتكسل تنقلها يبقى اطبعها أحسن ههههه...

وخصص للقسم ده حوالي 10 صفحات برضه لأنك كل شوية هتلاقي فتاوى جديدة فيها معاني أكتر فتحطها..

القسم ده برضه مش لازم تملاه كله دلوقتي لكن على مر الزمن.. معايا ؟

خالد: معاك كمل

أحمد: القسم بتاع منقولات ومقتبسات وخواطر ده هتخصص له مثلا 20 صفحة..
وده هتنقل أو تقص وتلزق أو تطبع أي مقال أو موضوع أو قصة حقيقية أو غير حقيقية أو أي مقولات أو أي جملة تشوفها وتؤثر فيك... أي حاجة من الحاجات دي يعني هتحطها في القسم ده عشان ترجعلها دايما..
وده هتقص وتلزق عادي مش لازم تكتب بإيدك يعني
مع مراعاة أن فيه خواطر هتكتبها أنت بنفسك.. يعني مثلا تفكرت في آية في القرآن الكريم وقرأت تفسيرها وحسيت بجمالها فتكتب.. استشعرت معنى معين مكنتش واخد بالك منه فتكتب.. اي حاجة تحب تكتبها اكتبها

والقسم اللي بعده: خطط النجاة ده سيبه دلوقتي.. هنملاه مع بعضنا على مر الأيام إن شاء الله..
بس خصص له مثلا 10 صفحات

خالد: جميل

أحمد: قسم مذكرات مجاهد خصص له أكتر حاجة ممكنة.. 30 صفحة مثلا..
لأن ده أكتر قسم هتكتب فيه
وده هتكتب فيه مذكراتك أنت.. يعني يوم ما تجاهد وتنجح بإذن الله هتيجي وتكتب عملت كذا وكان إحساسي كذا وتحكي كل حاجة.. يوم لا قدر الله لو وقعت في ذنب هتيجي وتعبر عن مشاعرك برضه وتفضفض..
القسم ده المفروض ترجعله بصورة شبه يومية..

خالد: الله المستعان.. ها واللي بعده

أحمد: اللي بعده مسيرتي للرقي، ده هنراقب فيه مستوانا إن شاء الله. تشوف أنت بتتقدم ولا إيه وكده..
هيكون عبارة عن زي جدول كده بتكتب كل يوم التاريخ وقدامه نجحت ولا لا قدر الله وقعت.. ومثلا تقعد تعد الايام اللي نجحتها على التوالي، ولو وقعت تبدأ تعد من الأول.. ولو وصلت لرقم معين تكافئ نفسك.. حركات كده يعني..
..
سيب للقسم ده 5 صفحات مثلا

آخر قسم اللي هو التمارين ده سيبه دلوقتي هنرجعله بعدين إن شاء الله.. وده خصص له بقية الكشكول

خالد: ده على أساس أن الكشكول ليه باقي ؟؟ أنت عديت ييجي 150 صفحة لغاية دلوقتي

أحمد: ههههههههههه.. بجد والله ؟ أنا ما أخدتش بالي..
طب تعالى نظبطها تاني

أول صفحة
والفهرس صفحة
والإقرار صفحة
والدعاء قول 4 صفحات
ولماذا أجاهد 10
وأدلة التحريم 10
والمنقولات والخواطر 20
والخطط 10
والمذكرات 30
والمسيرة 5 صفحات
والتمارين.. مممممم

ما زي الفل أهو يا عم.. أنت بتضحك عليا

خالد: لا والله بس كنت حاسس أنهم كتير أوي.. يللا معلش

أحمد: ده حتى الحسابات دي على أنك بتكتب في وش الصفحة بس وتسيب ظهرها زي ما قلت.. عامة ماتقلقش لو الكشكول خلص يا عم نبقى نجيب غيره.. بس أنت خلصه بس وربنا ييسر

خالد: يا رب

أحمد: صحيح.. أي حاجة هتكتبها ماتنساش تكتب التاريخ بتاعها.. مهم جدا بجد

خالد: طيب بس الموضوع يا أحمد مش حاسس أنه معقد شوية ؟

أحمد: مش أنت اللي كنت عايز خطوات عملية.. اشرب بقى.. شوف صدق نيتك هههههه

خالد: هههه.. لأ بجد مش كتير كده ؟

أحمد: بص.. أنا عارف أني طربقت الدنيا فوق دماغك.. بس كل اللي قلته ده حاجات بسيطة هتكتبها... وبعدين أنا طولت عشان بأشرح لكن لما أنت تيجي تنفذ هتلاقي الموضوع بسيط إن شاء الله..
مش لازم تجهز الكشكول كله في يوم واحد.. جهزه في يومين أو تلاتة مثلا.. بس ماتطولش عشان ماتكسلش بجد.. بجد يا خالد..

خالد: إن شاء الله..

أحمد: أنا مش هأسألك تاني.. أنت لما تخلص الكشكول وكل حاجة تبقى تمام تبقى تقول لي عشان نكمل رحلتنا إن شاء الله.. وطبعا لو فيه أي حاجة عايز تبقى تسألني فيها اسأل ماتتكسفش

خالد: أنا مش فاكر حاجة أصلا عشان أسأل فيها ههههه.. بس ماتقلقش لو اتلخبطت في حاجة هأسألك إن شاء الله.. وبعدين أنت مش قلت أن ده كشكولي أنا وأعمله بحيث يريحني وأحبه.. ماتقلقش

أحمد: تمام بالظبط.. يللا بقى لحسن قلتلك 10 دقايق وأدينا بقالنا نص ساعة نتكلم.. معلش أنا آسف

خالد: لا والله يا عم بالعكس ربنا يكرمك على وقتك ده كله.. أنا اللي بأستفيد

أحمد: بس ياض.. مش عايزني آخد ثواب ولا إيه هههه

خالد: بالهنا والشفا يا فندم

أحمد: ربنا يعزك... خالد أوعى تنسى أو تكسل.. الشيطان هيقرفك في عيشتك وهيحاول يشغلك عن الكشكول ده بآلاف الطرق.. الله يكرمك ماتلتفتش ليه وكمل مسيرتك..

خالد: أعوذ بالله من الشيطان الرجيم

أحمد: أعوذ بالله من الشيطان الرجيم.. ماتنساش تاخد معاك المغرب فلوس بقى عشان تشتري الكشكول إن شاء الله.. وماتسوفششششششش.. يللا يا عم.. أي خدمة ؟

خالد: شكرااااااااا

أحمد: العفو يا خالد.. في رعاية الله

خالد: في رعاية الله يا أحمد.. السلام عليكم

أحمد: وعليكم السلام ورحمة الله وبركاته



نلقاكم في الحلقة القادمة إن شاء الله تعالى
وماتنسوش الكشكول معاكم ; )​

​

 

[alemalbyelaram]

بارك الله فيك اخوى

،
ودى وتقديرى