ودّك من الدنيا تعيش وخاطرك ما هو عليل
لا ارتاح بالك ما غبطت الناس ..والاّ مالها
ودّك كلام الناس قول الحق بالشي القليل
[وعند العرب ما غاب كلمة حق واللي قالها]
وانا تحلويت القصايد حزة من كل ليل
لا جاتني انسى هلي وانسى البشر وابقالها
يوم القوافي تتجه كنها كما سيل يسيل
حلفت ما أعوّد ورى ما دام صرت اقبالها
بنات فكري لا حصل بالسالفه قالٍ وقيل
جَنـي وانا هذبتها ولبستها موالها
محلا شبوب النار والدله على جمر المليل
رسلان صفره مزعفره ..والهيل هو يعبالها
"في يد قرم ٍ لآعتزى راغه عيونك يالذليل
خفيف جانب دلته ما يشبعك فنجالها "
اسري واسرّي هاجسي كني عشيق للرحيل
والليل لامنه سرى الالغاز من حلالها
واسج فكري في البحر ميل ٍ بعد ميل وميل
وامرْ بامواج ٍ تلاطـم ينهبل من جالها
"كني غريب ضيّع دروبه ولا فييده دليل
اعمى بصر والاّ البصيره ميزته بلحالها "
وين"الفهيم" ابن الحمايل صاحب الهرج الجزيل؟
يفهم معي كلمة عتب..والنفس من علالها
"اخاوي الطيّب ولا لي بالرديْ قسم وحصيل
ومقرد الخلق آتعـوّذ من غثى جهالها
وانزّه النفس العزيزه في سما جو عليل
والحرْ الاشْـقر لا كفخ وكره بروس جبالها
(بشكي على اهل العرف والحق من واقع هزيل
مشاكلٍ من كل صوب ..وحالةٍ يرثالها)
قلبّت درج الطاوله ولـْعت في ناري فتيل
ونار تشعلل بالسواد ..اشحاجتي باشعالها ؟
"شبوها بياعة ضمايرهم وجحادة جميل
باعوا امم لاجل المصالح قصّر الله أحبالها
"عرب نعم حنا عرب "احرار" يزبنا الدخيل
اشْرف واطهر امة ٍ تسمو بفعل ارجالها "
((عرب يشوفون الجبال بعينهم حبات هيل
وشافوا النجوم انفوسهم هيهات من يرقالها)) !
عرب تعلّوا واعتلوا ثم اعدلوا درب ٍ يميل
الحق مبدأ بينهم..والصدق رمز اقوالها
عرب طلع منهم نبي الله يهدي بالدليل
الهاشميّ المصطفى زال المنـاكر زالها !
عمر وابوبكر وصلاح وخالد السيف السليل
اهنا العرب يوم العرب تفخر بفعل ابطالها !
(الله اكبر صارت امجاد العرب "عابر سبيل"
ذكرى تسّطر مجدها.. صعب الزمن يشتالها)
كنا ثلاث حروف صارت كالخيال المستحيل
واليوم صرنا "عالة ٍ" بين الامم واحوالها
(ياجيل ياجيل الزمن اصحى ونافس كل جيل
وقلها : وقل :ان الامم تزهى بكفاح اجيالها )
عسى ونرجع للكتاب ويرجع السيف الصقيل
والسيف وطـّى روس كانت بالسما لذيالها
*ويالله تعز شيوخنـا يالله " يالظل الظليل "
الليّ علينا فضلهم.. اسودها واشبالها
[ وانا قلبت الطاوله وريتها "صاحي" و"هبيل"
يوم "المهّبل غارقه في " نومها ومقيالها "]
