شرح ليه تستخدم بلوجر بدل غيرها؟؟؟

المصدر: ليه تستخدم بلوجر بدل غيرها؟؟؟
في منتدى : منتدى تطوير المواقع والمنتديات

السلام عليكم ورحمة الله وبركاته.

إخواني / أخواتي في منتديات Zyzoom

أحببت أن أضع بين أيديكم هذا المنشور الذي يوضح مميزات منصة بلوجر ويصحح بعض الأفكار الخاطئة عند بعض المستخدمين عن هذه المنصة.

#ملحوظة: المنشور ليس من كتابتي، أنا فقط نقلته هنا، راجي من الله أن يكون لنا مفيدا.

- كنت وعدت قبل كدة ببوست عن منصة بلوجر عشان الإشاعات الكتير اللي اتنشرت عنها واللي خوفت ناس كتير من استخدامها للمنصة، البوست مش مقارنة بين بلوجر أو ووردبريس أو مين الأفضل، البوست لتوضيح حقائق عن منصة بلوجر ومقارنة أهم مميزاتها بنظيرها في المنصة الأشهر ووردبريس.
بلوجر دي منصة محتوى CMS زيها زي ووردبريس، ويكس، ويبلي، جوميلا وغيرها، المنصة أسسها واحد اسمه Evan Williams في التسعينات وبعد كدة باعها لجوجل سنة 2003م وراح يساهم في تأسيس تويتر "ولعانة " المهم حاليا هي تاني أكتر منصة محتوى مستخدمة بعد منصة ووردبريس، يمكن في اعتقاد سائد إن أي حاجة مجانية فهي سيئة وطبعًا الاعتقاد ده خاطئ تمامًا لأن منصة ووردبريس برضه مجانية، بس إيه الفرق؟
1- استضافة بلوجر
- في الوقت اللي فيه مستخدم ووردبريس لو بيدخله 10 ألف زائر في اليوم بيحتاج يشتري استضافة بمبلغ وقدره $$$ شهريًا، انت ببساطة تقدر تدخل أضعاف العدد ده لموقعك بدون ما يكون عندك أي مشكلة ومش هتخاف إن الموقع ممكن يوقف زي ما بيحصل مع بعض مستخدمي ووردبريس، وده ببساطة لأن موقعك مستضاف على أقوى سيرفرات في العالم وهي سيرفرات جوجل، مش بس كدة ,بلوجر بتوفر لك شهادة حماية SSL مجانية بتركبها على المدونة في خطوتين وبتتفعل معاك في 5 دقايق وكل ده ببلاش.، غيرك بيدفع تمن الشهادة دي وبيبقى عنده مشاكل في تركيبها أو تغييرها لو غير الاستضافة.
2- سرعة بلوجر
- لو فرضنا إن عندنا موقعين بنفس المحتوى ونفس القالب على ووردبريس وبلوجر فموقع بلوجر هيبقى أسرع، أول حاجة الاستضافة زي ما قولنا، مهما كانت شركة الاستضافة اللي ووردبريس شغال عليها مستحيل سيرفراتها تبقى أقوى من سيرفرات جوجل، لما بترفع صور للموقع بتترفع على دومين فرعي ودي بيوفر لك تحميل أسرع، نقطة فنية بقى إن منصة بلوجر بنسميها منصة Client Side يعني إيه؟ يعني القالب بتاعها متبرمج بلغات يقدر المتصفح يفهمها ويترجمها ويعرضها للمستخدم زي HTML وCSS وغيرها، العكس ووردبريس بنسميه منصة Server Side، لأن لغات البرمجة اللي بتستخدم في برمجة قوالب ووردبريس زي PHP المتصفح مش بيقدر يترجمها فبيحولها للسيرفر اللي بيترجمها وبعد كدة يحولها لصفحة HTML ويبعتها للمتصفح عشان ويعرضها طبعا كل ده واخد من سرعة الموقع.
3- قوالب بلوجر
- بلوجر بتوفر مجموعة قوالب مجانية على المنصة، لكن الغالب إنك هتستخدم قالب مجاني خارجي من المتوفر على الإنترنت وفي قوالب كتير مجانية وتقدر تحملها بشكل رسمي، تقدر تحمل قوالب مدفوعة مجانا بطريقة رسمية من مواقع زي Sora Templates ودي بتقدم قوالب مدفوعة احترافية مجانا وبيبقى فيها رابط الموقع كنوع من الترويج. طبعًا تقدر تعرب القالب بسهولة من خلال أي برنامج لتعريب القوالب وتغير الخط ومبروك عليك.
- في برضه قوالب عربية ممتازة زي قالب GM وسيو بلس النسخ المجانية، ولو بتدور على قالب مدفوع سعره هيكون 10$ أو يزيد حاجة بسيطة.
- في الووردبريس القوالب بيكون سعرها أغلى عدة أضعاف وبيكون في صعوبة في تركيب القالب على المستخدمين المبتدئين، عكس بلوجر اللي كل اللي هتعمله إنك هترفع القالب وتعدل عليه من التخطيط أو من داخل القالب على حاجات بسيطة جدًا.
4- حماية بلوجر
- أفضل ميزة من وجهة نظري في بلوجر هي ميزة الحماية، الموقع ببساطة مش بيسمح لك توصل لجذر "Root" الموقع، يعني باختصار إنت لا تملك صلاحية الوصول لكافة الملفات على الموقع، صلاحيتك محدودة بعمل المشاركات وتغيير تصميم الموقع وتغيير الدومين وهكذا، لكن مثلًا انت مش هتقدر ترفع ملفات على موقعك.
- وبالرغم من إن في ناس شايفة إن ده من عيوب بلوجر لكن أنا شايفها ميزة مهمة جدًا، ببساطة إنت مجرد ما تحمي حساب جوجل اللي عليه المدونة انت كدة أمنت موقعك، على العكس مستخدم ووردبريس بيبقى عنده قلق من شركة الاستضافة ومن الإضافات اللي بيستخدمها ومن القالب المستخدم، ببساطة أي حاجة من دي ممكن تكون سبب في اختراق موقعك أو إنه يصاب ببرمجيات خبيثة أو غيره، يعني ممكن موقعك يتنسخ بالكامل ويتسرق محتواه من خلال إضافة عادية انت شغال بيها أو قالب مجاني استخدمته.
- مش بس كدة سكريبت الووردبريس ذات نفسه فيه خطر لإنه سكريبت مفتوح المصدر وكل فترة بيتم اكتشاف ثغرات فيه، وبالرغم إن الثغرات دي بيتم إصلاحها بسرعة لكن بيكون حصل أضرار لمستخدمين كتير، كمان كون ووردبريس هي المنصة الأكثر شعبية ده بيخليها عرضه أكتر للبحث عن الثغرات واستغلالها سواءً في الاسكربيت أو في الإضافات والقوالب الخاصة بيها.
5- فهرسة بلوجر
- طبعا في ناس بتقعد تفتي وتقول منصة كذا أرشفتها أسرع وأي هري، مفيش حاجة اسمها المنصة أسرع في الأرشفة، لكن في موقع فهرسته أسرع لأسباب كتير زي شهرة الموقع ومعدل النشر وحالة محرك البحث شغال طبيعي ولا المهندسين عمالين يبوظوا فيه وغيرها ، لكن نقطة مهمة إن عناكب البحث بتحب المواقع الخفيفة اللي سهل تتحرك جواها، الميزة دي في كل مواقع بلوجر، ده لأنه لغات المنصة من لغات البرمجة الخفيفة سريعة التنفيذ، سيرفر الموقع مش بيوقع ولا بيحصله بطء، سكريبت بلوجر ذات نفسه أخف من سكريبت ووردبريس.
6- بلوجر ستحذف موقعك في أي وقت
- دي أكتر كذبة منتشرة للأسف عن بلوجر، مش معنى إن موقعك مستضاف بشكل مجاني من جوجل إنها ببساطة تقدر تحذفه بسهولة وبالمزاج في أي وقت، انت لما بتعمل مدونة على المنصة بتلتزم ببنود وشروط الخدمة الخاصة بمنصة بلوجر، التزمت بيها موقعك هيفضل شغال ليوم القيامة، خالفت الشروط موقعك هيتحذف زي ما الفيديو بتاعك على اليوتيوب هيتحذف لو مخالف والبوست على الفيسبوك هيتحذف لو مخالف وأي خدمة مجانية أو غير مجانية ما بتعمل لو المستخدم لم يلتزم بشروط الخدمة.
- من فترة مدونة كن مدون كانت اتحذفت وهي مدونة كانت بدومين مجاني، طبعًا نفس الكذبة قعدت تلف على الجروبات لأن المدونة كانت من المدونات المعروفة لكتير من مستخدمي بلوجر كمان مؤسس المدونة معروف إن أي حاجة في المدونة من شغله يعني مش بيسرق حاجة، طبعًا المدونة رجعت بعد المراجعة وشغالة عادي دلوقتي، نفس الحكاية حصلت قبل كدة مع مدونة عالم العرب ورجعت بعد الحذف، فالحكاية بكل بساطة اشتغل صح وبدون ما تخالف، ومتخافش على موقعك.
- نختم النقطة دي بإن أكبر المدونات العربية خصوصًا في مجال التقنية شغالة على بلوجر طبعًا زي المحترف وحوحو وعالم الكمبيوتر وغيرها كتير، حتى معظم المواقع في مجال تحميل البرامج هتلاقيها بلوجر، كمان أكبر موقع إخباري في مجال أمن المعلومات وأحد أكبر المواقع الإخبارية في العالم وهو موقع The Hacker News شغال على بلوجر.
* دي كانت أبرز المميزات الخاصة بالمنصة، لو حد عنده اعتراض على أي حاجة يوضح وجهة نظره في تعليق، وبأكد تاني البوست مش مقارنة ولا إني بعيب في ووردبريس، لكن البوست لهدم بعض المعتقدات الخاطئة عن بلوجر.

 

مع احترامي ليك بس عندي شوية اختلافات مع الموجود في البوست

النقطة الاولي: الاستضافة

صحيح ان الاستضافة تقدر تستحمل عدد كبير من الاشخاص في نفس الوقت وفنفس الوقت مجانية لكن معندكس اي قدرة علي التحكم في السرعة وتحسينها ( تخيل حاليا ان اهم عوامل السيو تبعا لجوجل هي السرعة ) هتقدر تنافس ازاي؟

النقطة الثانية: بالنسبة لسرعة المدونة

مش متفق تماما لان بعد نقل واحدة من مدوناتي من بلوجر لوردبريس وتحليل السرعة كانت النتيجة ان سرعة الموقع علي وردبريس افصل

النقطة الثالثة: القالب

صحيح فيه قوالب كتيير جدا لبلوجر مجانية لكن في نفس الوقت فيه برضو قوالب كتيير جدا لوردبريس مجانية
والنقطة الفاصلة هنا هي امكانية بناء صفحة وردبريس احترافية جدا والممكن تستخدمها ك landing page لكن في بلوجر متقدرش تعمل اي صفحات خاصة هتلتزم بس بالشكل الخاص بالتمبلت

النقطة الرابعة: حماية بلوجر

علي الرغم من انه فعلا حماية بلوجر اسهل ( مش افضل ) الا انك تقدر بكل سهولة تأمن مدونة وردبريس وتمنع والاهم من كدا هو وجود ال Backup والهيخليك لو حصلت اي مشكلة تقدر تسترجعها
لكن علي بلوجر مثلا تم حذف موضوع خاص باحدي مدوناتي بدون ان يحتوي علي اي شئ هل تستتطيع استرجاعه في هذه الحالة ؟ بالتأكيد لا

النقطة الخامسة: السكريبت اخف

في الحقيقة اول مرة اسمع ده انا مش بشكك في مدي جودة منصة بلوجر او بقول انها مش مناسبة لكن مع استخدام قالب خفيف جدا علي وردبريس ( ودول كتيير جدا ) واستضافة سريعة سهل جدا توصل لسرعه ممتازة وبالتالي ارشفة كويسة علي حسب رأي حضرتك ( علي الرغم من عدم اقتناعي الكامل )

النقطة الاخيرة: حذف المدونة

في الغالب كتيير من المبتدئين علي بلوجر مش هيقدروا يمشوا فخطوات المراجعة وهيملوا ده كمان زيادة علي ان خطوات المراجعة بتستغرق وقت مش قليل فلو ده مصدر رزق الشخص الوحيد فمظنش انه ينفع يخاطر بيه

في النهاية رأس حضرتك هو رأي الكثير من الاشخاص ورأئي في السابق قبل حذف اول موضوع لي بدون اي حق

بالتوفيق ان شاء الله

 

موضوع رائع أخي استفدت كثيرا شكرا وجزاك الله خيرا

 

السلام عليكم و رحمة الله تعالى و بركاته،
شخصيا أستعمل بلوغر نظرا لسهولة إضافة كودات الإعلانات عليه
بحيث أنه يمكنك بكبسة زر إضافة كود إعلان عن طريق هذه الخاصية :

 

بارك الله فيك
شكراً لك على الطرح الرائع

 

مشكووور اخى